في 2007 بغيت نحارب البطالة درت واحد
التفريشة ديال السلعة فالشارع.. كنت كنبيع كلينكس والسيراج وحجر الراديو و
السماطي ... المهم كنجيب المصروف اليومي ديالي .. حدايا كان واحد السيد
سميتو مراد كيبيع الديطاي ومسكة فلاش و الحلوة وباسطا... فاليامات اللولا
كنت كنمشي لعندو نصرف وكان يجي يصرف عندي .. من بعد وليت كنمشي نتسخر
ونخليه حاضيلي السلعة .. تطورات الصداقة تا وليت كنبيعلو الديطاي منين
كيغيب .. هكذا ولينا صحاب بزااااف .. واحد النهار بدات حملة تحرير الملك
العمومي وبقاو المخازنية يجريو علينا ..
هزينا راسنا ومشينا حدا المنار وبقينا نفرشو... من بعد جاو المخازنية وجراو
علينا.. رجعنا لبلاصتنا جاو جراو علينا .. هكذا تا مبقيناش نفرشو .. واحد
النهار تلاقينا وبدا يعاودلى بلي ماعندو باش يخلص الكرا والما وخاصو يدي
الوالدة ديالو للطبيب حيت مبقاتش تزيد ..وقبل منتفارقو تافقنا نجيو فالليل
نفرشو نترزقو الله .. فالعشيا يالاه بدينا نفرشو جاو عندنا المخازنية
وقالونا جمعو .. فداك اللحظة نتافض صاحبي مراد وبدا يركل الكرطونة ديال
الديطاي بطريقة هستيرية ويغوت بجووووووهد وانا مكنسرقش واااا مكنشفرش .. و
بدا يبكي .. جمعتلو الديطاي وعييت نسكت فيه والو مبغاش يسكت ..واحد اللحظة
بقا غادي كيجري وختفا فالزحام .. من داك اللحظة مشفتو .. دازت سنوات نسيتو
من بالي .. عاد دابا كنت غادي للقهوة.. وصلت لحدا حي الديوان وانا نشوف
واحد السيد موسخ ريحتو خايبا وكيهضر بوحدو .. تشابهلي مع مراد وقفت وبقيت
نشوف فيه .. داز من حدايا معبرنيش .. واحد اللقطة ضرت وغوت مراااد دار
لعندي وشااااااف فيا مطولا و قالي جمال ... قربت لعندو وقبل منهضر قالي
طيني شي درهم نشري خبزة راه عليا الجوع .. وزاد قالي توحشتك بزاااف خاي
جمال قولهوم انا ماشي حمق .. وداك السعات شاف بعيد وزاد بحالو بلا ميودعني
.. بقيت مصدوم وانا كنشوف فيه.. تا درهم لي طلبولي مطيتولهش بقوة الصدمة ..
كملت طريقي تا وصلت للقهوة .. حطيت التلفون فوق الطابلا ودرت يدي حدا عيني
بديت نكتبلكوم هاد القصة وأنا كنبكي مخبع باش ميشوفونيش الناس ..
بواسطة جمال البكاي
